Si Rich Asuncion, isang beauty queen at artista sa Pilipinas; at ang kanyang asawang si Ben Mudie na isang Filipino-Australian ay miyembro naman ng rugby team sa Pilipinas; habang si Cheene Manalo, isang Program Head sa Psychology Department sa isang pamantasan sa Pilipinas—lahat sila, matatag na hinaharap ang hamon ng buhay at nagpapatuloy sa pakikipagsapalaran sa bansang Australia.
Dahil sa determinasyong makapag-aral sa Australia, pinasok ni Manalo ang anumang odd jobs na pwede niyang mapagtrabahuan. Ang kanyang kita ang pinangtustos niya sa kanyang pag-aaral.
“…pumasok ako as cleaner, as saleslady, nag–work din ako sa client na may autism. So ako lahat nagpakain, paligo, lahat ‘yun na–experience ko while studying…hindi mo masyadong maiisip na parang ikinahiya mo ‘yung job na ‘yun kasi, when you are faced with such need to really survive not only financially but kelangan matapang din ‘yung loob mo, you have to prepare,” pagbabahagi ni Manalo.
Dahil sa kanyang pagsisikap, natapos ni Manalo ang kanyang kursong Masters in Psychotherapy and Counselling sa Western Sydney University noong nakaraang taon at ngayon ay isa na siyang ganap na registered psychotherapist. Nagtatrabaho siya bilang counselor sa isang private organisation sa Australia.
“…wala namang shortcuts ang dreams, ang success, so you have to be ready as well sa mga failures and mistakes which is okay, kasi part naman ‘yun of striving…of what really matters in life,” dagdag pa ni Manalo.
Samantala, bago pa umabot sa Australia ang nakahahawang Coronavirus, umuwi roon ang mag-asawang Rich Asuncion at Ben Mudie. At dahil sa pandemya, nagdesisyon si Mudie na roon na sila manirahan ni Asuncion kasama ang kanilang anak na si Bella Brie.
Mula sa pagiging atleta sa Pilipinas, pinasok ni Mudie ang pagtuturo sa isang day care center sa Sydney, Australia kasabay ng kanyang pag-aaral ng diploma course na Early Childhood Education and Care bilang requirement sa kanyang pagiging guro sa mga bata.
Habang ang asawang si Rich Asuncion na tumalikod na sa showbiz ay pinasok ang hospitality industry bilang isang waitress na pasok sa kanyang kurso sa kolehiyo na nasa hanay ng service-oriented industry.
“It’s really different from my job before, ako ‘yung sineserve-an, ngayon ako na ‘yung nagse–serve. Pero, I took up Tourism in college pero in line siya with my course so ‘di ako nahirapan…I truly enjoy it. I could easily let go of waitressing but I want to do it longer pa…dito sa Australia or any other countries besides Philippines, parang equal ang treatment nila dito,” kwento ni Asuncion.
Para naman kay Mudie, sa gitna ng pandemya tuloy ang pagsisikap nila para sa kanilang pamilya at pinahahalagahan niya ang pantay na pagkilala sa kanila na hindi batay sa katayuan sa buhay ng isang indibidwal.
“…it’s a more character-based…we don’t judge people on who they are…not what they do for work or anything…I think that’s where the Filipino culture really thrives as well, the nicest people ever in services like nurse, bagay talaga sa ugali ng Filipino,” ayon pa kay Mudie.
Panoorin ang iba pang ulat ng TFC News APAC sa tfc.tv.