Mga natatanging Pinoy sa Dubai at Northern Emirates, binigyang parangal sa Dakilang Bayani Awards

Photo: Kasama ni Philippine Consul General to Dubai Paul Raymund Cortes at kanyang kabiyak, Madame Yasmin Cortes ang 2021 Dakilang Bayani Awardees (mula kaliwa) Multi-awarded veteran journalist Angel Tesorero, volunteer at negosyanteng si Fevie Laurilla, community leader na si Josie Conlu, multi-awarded global business leader at CEO Dr. Mary Jane Alvero-Al Mahdi at Dubai-based internationally acclaimed designer Michael Cinco, negosyanteng si Lalaine Chu-Benitez, at community leader, Ace Lester Quijada (Dubai PCG photo)

DUBAI – Binigyang parangal ng Philippine Consulate General sa Dubai ang mga natatanging Filipino expats sa Dubai at Northern Emirates sa 2021 edisyon ng Dakilang Bayani Awards nitong June 11. Itinaon ang event sa pagdiriwang ng konsulado ng ika-123 Araw ng Kasarinlan.

Ang Dakilang Bayani o Noble Hero ay ang pinakamataas na parangal na ibinibigay ng Office of the Consul General sa isang Overseas Filipino. Ang nasabing award ay pagkilala ng konsulado sa talento, kakayahan, mga nakamit at ang malasakit na kanilang ipinakita sa Filipino community.

Matapos ng masusing pagpili, ang pitong Pilipino na hinirang bilang mga Dakilang Bayani ay sina (1) Dr. Mary Jane Alvero, isang multi-awarded global business leader at CEO na tumutulong sa kanyang mga kababayan sa iba’t-ibang paraan. (2) Ms. Lalaine Chu-Benitez, isang Pinay advocate na nagsusulong sa pagiging world-class ng Pilipino. (3) Mr. Michael Cinco, isang internationally acclaimed designer na nagbigay ng karangalan sa Pilipinas. (4) Ms. Josie Conlu, isang community champion na nakilala sa social media platforms at pagtulong sa mga distressed Filipinos; (5) Ms. Fevie Laurilla, nakilala sa kanyang volunteer work para sa women empowerment at nagbibigay ng financial literacy at mental health seminars; (6) Mr. Ace Lester Quijada, aktibo sa Filipino community at palaging tumutulong sa kapwa Pinoy at (7) Mr. Angel Tesorero, isang multi-awarded veteran journalist na nagsusulat tungkol sa Filipino community sa UAE.

Nominado ng Filipino Community ang awardees at masusing pinili ng screening committee. Dahil sa dami ng nominees ngayong taon, kinilala rin ang limang finalist dahil sa kanilang importanteng naiambag sa Filipino Community. Sila’y sina Ms. Emelina Parcia, Mr. Francisco Boton, Mr. Ion Gonzaga, Ms. Lou Parroco, at Mr. Richard Zulueta. Tumanggap ang awardees at finalists ng trophies at plaques of appreciation.

Ang Dakilang Bayani Awards ay sinimulan noong 2016 para ma-inspire ang mga Pinoy sa Dubai at Northern Emirates na maging aktibo sa Filipino Community habang sila’y nagtatrabaho roon. – End

Basahin ang karagdagang impormasyon dito.